驚喜的生日2010@東部華僑城 DAY 1

今年生日, 我倆第一次結伴到深圳兩日遊, 地點係大梅沙的東部華僑城.

他之前唔聲唔聲已經安排好一切喇~ 究竟會有咩suprise呢？

3月30號早上, 乘直通車來到大梅沙, 唔知佢book左咩酒店, 心諗大陸的酒店

會好"up"耷的, 點知......第一個驚喜就係去到酒店門口.

我 : 嘩~~就係住呢間喇?!

入到酒店大堂都好靚架.

去到酒店房, 又係第二個驚喜.又再嘩多次 xD  好大間呀!! 咁靚既~ (很大鄉里嗎?! 哈!)

仲有露台添架~ 好正啊!!

由酒店望出去右邊的景色, 一面無際的海~

之後我們由酒店步行去東部華僑城，路程唔算遠, 大約十至十五分鐘左右吧.

去到正門買飛入去玩喇~影吓呢舊大石先.

必影景點之一, 大俠谷瀑布.

我地先黎到海菲德小鎮, 呢度的環境幾靚的, 一間間啡色的屋仔, 好別緻.

而呢度都有好幾間食店餐廳, 我地去左必胜客醫吓肚先.

食完嘢之後, 我地就行去搭吊車, 去到雲海高地的登峰造級, 呢度超大風和好涼呢.

登峰造級咪就係呢個半空中的U型位囉, 個地下係透明架, 不過都幾濛吓,

我唔咪好驚喎, 幾叻! 但有人就好驚, 嚷著要番出去, 哈哈!! 啲大陸同胞仲成堆人

走晒入黎係度跳, 滴汗 =.="

 

之後就坐小火車遊覽周圍景色, 沿途有廣播介紹, 呢一排屋仔都係酒店黎架, 好靚.

估吓呢度係咩黎? 又係酒店?! 唔咪, 係聽完都O晒咀的員工宿舍,

有哂露台種哂花, 真係正~

搭火車後來到茶溪谷呢邊喇,  不久就見到向日葵園, 好多太陽花, 好大朵,

好靚, 正當我企上去一個類似相框的地方想影相之際, 就仆親喇!! 痛 >.<

腳撞瘀了......

跟住黎到呢個四季花田, 唔顏六色的花, 很耀眼奪目呢~影左唔少相.

搭火車回程時仲見到原來花田一幅接一幅的, 好燦爛啊~~~

呢邊都係欣賞景色為主, 黎到呢個花鐘教堂留影. 呢邊仲有一個四季植物館的,

有雀仔, 大南瓜, 花花草草睇吓......

到黃昏, 我地搭番火車,纜車出番正門, 回酒店唞唞, 呢間就係我地住既酒店外貌喇~

之後佢帶我去食晚飯, 第三個驚喜, 食咩呢?

行左一輪大運 ( :P) , 原來係去附近一間食乳鴿的食肆<五谷芳>,

他說好多人話好食喎~去到地方好企理乾淨, 餐具都以密封式膠紙包好哂架.

我地點左四樣嘢, 一人一隻乳鴿, 杏仁花支丸, 鐵板茄子同粉絲煲.

最好味的係乳鴿和茄子, yummy~~

 

食飽返酒店休息喇, 沖完涼後都12點, 即是搭入我生日喇 :D

正當我吹緊頭之際, 佢話有人按門鐘, 但我唔敢開喎, 於是佢走去開啦~

原來第四個驚喜係佢安排左酒店送生日蛋糕黎呢!!! 好開心啊~~~

首先收到的禮物係呢兩樣, 哈哈哈~~~

第一天已經好愉快呢~估唔到臨睡前仲有第五個驚喜, 就係收左喺枕頭下的小禮物喇,

嘻嘻, thanks~~

第二天的正日生日, 仲會有咩驚喜呢^^ 期待~~